حْرُوفْ الْـكَاسْ

زجلية لابوياسين محمد بنعلي من ديوان حروف المعاني

انْـطَـقْ الّْـكَـاسْ وْقَـالْ
فْـأَوّْلْ الَـمْـقَـالْ..
فَـالْـكْ زِينْ يَا هَــذَا
لَاتْـعُودْ تْـفَـكَّـرْ فْـلَـمْسَالْ
وَلَاتْـقُولْ هَـذَا مُحَالْ
بْالْـعَـزْمْ تُوْصَلْ
بْالِارَادَة
تـتْـعَـدَّا الْحَـالْ وُالْـمُحَالْ
قْـبَـلْ زَهْـرَكْ مَا يَـذْبَــالْ
بـزْعَامْـتَـكْ الْـمَعْـتَـادَة
كَــسّْـرْ لَـقْـيُودْ وْلَـغْــلَالْ
احْـسَـبْـهَـا غِي هْـبَالْ
وُلاَّ كْــلَامْ جَاكْ سْـرَادَا
اتْـبَعْ فْـطْـرِيـقَـكْ هَذْ الْـفَالْ
تَـغْـنَـمْ وتْـسَتْـفَــالْ
وْتَـكْـسَبْ فِيهْ ايْـفَـادَا..

قُـلْـتْ لْـنَـفْسِي
يَارَاسِي
وَاشْ الْـكَـاسْ امْـضَـبّْـبْ
وُلَّا تْـلَـفْ لِيهْ الـشُّـوفْ؟
ازْدَحْـتُو حْتَّى رْجَعْ شْـقُــوفْ
هْــزّيتْ ثَانِي كَـاسْ جْـدِيدْ
وُمْسَـحْـتْ لِيهْ لَـحْـرُوفْ
عَـمَّـرْتُـه وُخْـوِيــتُـــه
وُرْجَـعْـتْ لِيهْ نْـشُـوفْ
ضْحَـكْ الْـكَـاسْ وُتْـجَـهَّـمْ
وُبَاقِي طِيبْ قْـهَـوْتِي يْـنَسّْـمْ
تْـبَـسّْـمْ نْـطَـقْ وْقَــــالْ:
مَـاصَـدَّقْـتِيـــشْ الْـفَــالْ
وَاخَّ لَـحْـرُوفْ وَاضْحَة
نْـعَـدْرَكْ عْـلىَ مَا فَـاتْ
وْقْـسَاوْةْ مَا دَازْ منْ اوْقَــاتْ
لَــكِــنْ الآتيْ
شَافْ كْـتَـابْـكْ لَــقْـدِيــمْ
شَـافْ عْــزّْكْ
وْشَـافْ مَا قَـاسِيتِي منْ ضِيــمْ
وْجَايْ لِيـكْ يِـتْـبَـسَّمْ
كِيفْ عَـبْـدْ خْدِيــمْ
إِوا.. لُـوحْ الضِّـيـمْ
وُطْــلَــعْ تْــضِيــمْ..
وَاخَّ الـشّْـكْ غْــلَـبْ
رْجَعْتْ لْلـشُّـوفْ امْـدَبْـدَبْ
سْـهِـيتْ مُـدَّة وْانَـا
تَـايِــهْ فْسُوقْ الكَانـا
نَـتْـأَمّْـلْ فيْ لَحْــرُوفْ
نْـحَــطّْ وُنْـهَـزّْ وْنَـرْجَعْ نْـشُوفْ
حْـتَّى رْحَــلْ الـشّْــكْ
وْغَـابْ مَنْ جْـنَانِي
وُالْأَمَــلْ زَارْ مْـكَــانِي
احْيَــا اعْـرُوقِي وْوَجْــدَانِي
وُتـبَــسّْـمْ الْـخَـاطْـرْ
وْ زَهّْـرَاتْ اغْــصَانِي
وُاسْجَـدْتْ لَلْـقَـبْـلَـة
قُـلْـتْ اللهْ اعْـطَـانِي